31岁「靓汤」汤洛雯在今年3月与拍拖4年几嘅罗天宇宣佈分手，靓汤一直话自己系单身，但月初出席黎国辉（阿感）婚礼时就好搏命抢花球，令人觉得佢好恨嫁。

日前《苹果》读者林小姐透过「爆相爆片」，透露上周五凌晨1点半左右，喺铜锣湾耀华街一间上楼酒吧，遇见汤洛雯同龚嘉欣、庄思敏、庄思明等一齐夜蒲。穿上超短裙晒长腿嘅靓汤劲吸睛，全晚与一男子形影不离，林小姐话：「汤洛雯有同朋友玩掟乒乓波嘅酒game，玩到咁上下，佢就坐左上吧枱，同个男人好好倾，个男嘅仲摸佢大髀。」林小姐话佢的之后企左喺吧枱边倾偈，之后男嘅越贴越近，好似人肉三文治咁，背脊贴住靓汤，下半身贴到实，难得靓汤完全唔抗拒，倾左几句，男嘅就借力起身，动作有点不雅。

同场嘅龚嘉欣亦好受男士欢迎，期间被一肥一瘦中年男士「夹住」走唔甩，身形较胖嘅男士突然出手搭住嘉欣膊头，搞到佢个样有啲惊，即时耸耸肩将双手放喺心口，隔一阵终于「耍得甩」，就望住企对面枱嘅汤洛雯露出一副好惨情嘅样。而庄思敏都有同朋友玩饮酒game，思明较乖，全晚只系坐定定睇人玩，临走前仲同靓汤goodbye kiss。约凌晨二时，嘉欣拉住靓汤准备离开，与同行友人前后脚一齐坐电梯走。

汤洛雯日前接受传媒访问时否认有新男友，被指与一男子好close，佢话﹕「No la.有朋友生日，一班朋友去庆祝，龚嘉欣、庄思明、思敏都喺度，全部都系朋友，之后去左思敏舖头坐左一阵咋嘛。Still single,冇男朋友。」咁有冇追求者？靓汤都好坦白﹕「都有认识紧嘅新朋友，不过真系好初步啦。」

从片段所见，与汤洛雯缠绵一晚嘅男士，原来系姚子羚嘅有米前度男友郑子邦（的士邦）！在ig发现，当晚其实系皮草太子爷王大业（Andy）嘅生日，一班朋友食饭开party，丁子高、周汶錡、陈静(DaDa)、周启邦儿子周国丰等都有出席，之后年轻嘅一班朋友再有下场，齐齐落酒吧狂欢。