TVB劇集《愛．回家之開心速遞》星期一至五陪住大家食飯，劇中有唔少CP情侶檔大受歡迎，大家唔好以爲只得情侶受歡迎，充滿“He He味”嘅男男組合，同樣都人氣爆燈！依家就同大家細數以下幾對CP情侶檔，睇嚇邊對啱你哋心水！

大小姐　送水輝

“大小姐”林淑敏同“送水輝”許家傑呢對情侶經歷幾多風浪，終於可以一齊！雖然要玩地下情唔可以公開，但佢兩個喺愛巢“覓雪琴室”入面睇嚇電視、玩嚇煮飯仔，一樣都咁有愛！但系可惜依家冇啦啦彈出“商良”黎振燁被安排同“大小姐”政治拍拖，搞到同“送水輝”呢段戀情有危機，但好在“送水輝”成功儲到錢開酒吧同“大小姐”拉近距離，暫時可以保住戀情！

熊若水　龔燁

拖住成年幾嘅“龔水戀”，終於喺近期修成正果，上演世紀一吻，完到一班粉絲嘅願望！平時喺職場上爲自己多過爲人嘅“龔燁”張景淳面對“熊若水”呂慧儀嗰時，成個廿四孝男人咁，又做外賣仔送早餐，又不時心痛女友被“大小姐”鬧，雖然開頭要玩地下情，但最終喺誤打誤撞之下，順勢公開戀情，人人都知“龔水”拍拖！

金城安　譚育英

“金城安”周嘉洛雖然系一個廢青，但都追到個條件好嘅女朋友“譚育英”林凱恩，“譚育英”讀書又叻，人又靚，但仍然對住“金城安”一條心，平時又會上“金城安”屋企同“熊家”嘅人相處，真系廿四孝好女友！

金城安　譚道德

“金城安”周嘉洛同“譚育英”林凱恩拍拖，咁點解又會同佢爸爸“譚道德”陳榮峻成爲CP情侶檔呢？事緣繫有次“譚道德”想改造“金城安”，叫佢嚟佢屋企參加兩日一夜嘅訓練營，點知“金城安”開直播時，“譚道德”唔小心冇着衫現身，再加上“金城安”喺“譚道德”嘅學校教壞學生，搞到“譚道德”失去教育界最高榮譽“春風化雨獎”，令到“譚道德”每次見到“金城安”都好激動，結下不解之緣。

池子孝　George

呢對組合目前爲止喺《愛》劇真系最“HeHe味濃”嘅一對，事緣因爲“池子孝”阮政峯要惡補補習去考DSE，但就畀“熊心如”蘇韻姿誤會佢同“George”張明偉系一對。最新一集，講因爲DSE逼近，“George”幫“池子孝”進行特訓，搞到“池子孝”大壓力到要上天台抖氣，但“George”以爲佢自殺，即刻上天台攬住佢，令大家再次誤會呢對“小情侶”，網友睇完都話勁搞笑！

熊尚善　潮偉

“熊尚善”滕麗名同“潮偉”袁文傑呢對已經達老夫老妻級數，兩位相處方法成個老公老婆咁，其中一集“潮偉”被o靚模追求，開頭“熊尚善”危機意識好低，完全冇意欲打扮，最後“熊尚善”諗諗下唔對路，扮靚還擊，令“潮偉”由心笑出嚟，因爲有人緊張自己。